Yur 5 Years 11 Months Old Pikin Development And Milestones Guide For African Parents

Yur 5 Years 11 Months Old Pikin Development And Milestones Guide For African Parents

Wetin yur pikin fit surprise yu with dis month? Make yu see which development yur pikin dey reach dis month.

Na one month remain make yur 5 years 11 months old pikin clock 6 years old. For person wen don nearli start school, yur pikin development dey incredible. From di time wen he start to crawl till now wen he dey run, climb and even talk without any kine wahala.

Which oda ogbonge development milestones yu fit expect from yur pikin dis month? Make we see. Make yu no forget sey dem no write all dese milestones for rock o, and each pikin go achieve am wen time don reach. If any thing about yur pikin development dey worri yu, go see doktor .

how they play

5 Years 11 Months Old Pikin Development and Milestones: Shey yur pikin dey on track?

Physical Development

By now, yur 5 years 11 months old pikin action and movement don dey controlled pass before. All dat chubbiness wen he been get from wen he be toddla don disappear. Yur pikin average height and weight suppose be:

  • Boys
    – Height: 115.1 cm (45.3 inches)
    – Weight: 20.6 kg (45.4lb)
  • Girls
    – Height: 114.4 cm (45.0 inches)
    – Weight: 20.1 kg (44.4lb)

No forget sey some pikin height and weight dey determined by dia genes, so make yu no use yur own pikin take compare odas wen dey him age. Yur pikin suppose don get perfect vision by now.

Make we look oda physical development wen relate to him fine and gross moto skills wen yu fit see for yur 5 years 11 months old pikin.

  • Don dey dance to beat
  • Sabi ride two wheel bicycle
  • Dey learn sport wen get betta physical control
  • Don dey use three finger take hold pencil
  • Dey skip well
  • Fit balance for one leg we him eye close for few seconds
  • Don dey kick ball well
  • Sabi use scissors tale cut shapes well.
  • Dey run fast

Tips 

  • Make sure sey yur pikin dey play reach one hour efiri day
  • Encourage yur pikin make he dey active, make yu follow am do sports as a famili.
  • Reduce di time wen yur pikin dey use take watch TV.
  • Enrol yur pikin for sports. E go boost yur pikin physical development and teach am how to dey disciplined and responsible.

Wen yu fit see doktor

If yur pikin,

  • Lose skills wen he been get
  • No fit hold pencil well
  • Dey clumsi wen he dey play
  • No dey see or hia well

speech and language has developed

Cognitive Development

For short time now, yur 5 years 11 months old pikin go soon start new chapta of him life; school! By now, yur pikin cognitive abiliti go don develop reach wia he fit handle "big pikin" school.

From di way wen he dey take hold pencil well, to sey he don sabi how to read and write small among oda things, see some cognitive development marker wen yu fit see for yur pikin.

  • Sabi di alfabet well
  • Fit count 1-20
  • Dey read two letta words
  • Dey use logic take argue him case
  • Undastand wetin be past, present and future
  • Get veri good memori
  • Dey concentrate reach 10-15 minutes for one task
  • Fit count three numbas from back
  • Sabi day/night, left/right.
  • Don dey read book wen dey okay for him age.
  • Dey ask yu million question
  • Get interest for some topics wen catch him attention

Tips

  • Now na di best time to go regista yur pikin for librari. Show yur pikin how he fit find book wen he get interest put.
  • Improve di way wen yur pikin dey think; Use question take ansa some of him own question.
  • Take yur pikin go place wen go make am learn.
  • Read, read, read! Book dey open yur pikin imagination.
  • No push yur pikin make he do work wen high pass him age academicali.

Wen yu fit follow doktor talk

If yur pikin,

  • No fit count reach 20
  • Neva sabi him alfabet
  • No get interest to ask yu question or to gada new knowledge

shows little or no interests playing

Social and Emotional Development

Na wa o, see how far yur 5 years 11 months old pikin don come wen e reach social and emotional development. He don grow from dat time wen he dey throw tantrum, to dey follow friend play, yur pikin don turn social buttafly.

Make yu watch for di following development.

  • Yur pikin dey follow oda pipo play
  • Don dey follow rule of game
  • Fit dey bossy
  • Dey feel for oda pipo.
  • Dey comfort him friends wen dem dey sad.
  • Prefer to play with him own sex.
  • Prefer make he follow friend play dan say make he play by himsef.
  • Dey say "please" and thank you"
  • No dey quick throw tantrum but go cry wen he dey upset.
  • Need yur love and approval
  • Love make adult dey praise am
  • Fit don get best friend
  • Dey listen to instruction

Tips

  • If yur pikin dey shy, no force am go follow oda pipo talk. Instead enrol am for sports, art class or arrange playdate for am for house.
  • Teach yur pikin table manners.
  • Teach yur pikin how to behave inside house and outside.
  • Na yur behavior yur pikin dey copi, so make yu be di person wen yu want make yur pikin be.
  • Dey gentle but firm wen yu dey discipline yur pikin and try make yu no lose tempa.
  • Follow yur pikin talk about danger wen dey if he follow stranger talk.
  • E dey alrite if yur pikin dey bored. Try make yu no ova load yur pikin with wetin to do, instead teach am how to enjoy alone time.

Wen yu fit follow doktor talk

If yur pikin,

  • Dey show extreme emotion
  • No dey follow oda shidren play
  • Prefer make he compani of shidren wen old pass am or adult
  • Dey violent wen he dey vex

how your child eats at 5 years 11 months old

Health and Nutrition: 5 Years 11 Months Old Pikin

Kontinu to dey give yur 5 years 11 months old pikin di balanced diet wen he need to boost him general development. No forget to encourage yur pikin make he drink plenti water throughout di day. Try reduce di way wen yu dey take give am sweet mouth.

Yur pikin need about 1,700 to 1,800 calori efiri day.

Typicalli, di calorie intake for boys and girls wen dey dis age na:

  • Boys: 1,744 Kcal/day
  • Girls: 1,636 Kcal/day

And dia nutrition suppose get di following:

Protein  

Yur pikin need two servings of protein (32.4g) per day. One serving dey equal to one to three tablespoons of lean meat, chicken, or fish, four to five tablespoons of dry beans and peas, or one egg.

Fruits 

Yur pikin need about one to three (100g) cups of fruits everyday. One cup of fruit dey equal to one cup of fresh, frozen, or canned fruit, 1/2 cup dried fruit, 1/2 of a large apple, one eight- or nine-inch banana, or one medium grapefruit.

Give yur pikin 100% fruit drink without any sugar.

Vegetables 

For dis stage, yur pikin need two cups (100g each) of vegetables efiri day. One cup of vegetables dey equal to one cup of cooked or raw vegetables, two cups of raw leafy greens, one large tomato, or two medium carrots.

Try make yu dey give yur pikin different kine vegetables. If yu dey select di one wen dey can or frozen one, find di one wen get low sodium.

Grains 

Try introduce minimum of four ounces of grains inside yur pikin food.  One ounce of grains dey equal to one slice of bread, one cup of ready-to-eat cereal, or 1/2 cup of pasta wen yu cook.

Milk/Dairy 

Yur pikin need to dey drink minimum of 17 to 20 ounces of milk per day. Yu fit even mix am with yogurt or soya milk, 1½ ounces of natural cheese , or two ounces of cheese wen dey processed.

Na di summari of wetin yur pikin need be dis so. Yu fit read up to sabi di amount:

  • Fruits: three cup for boys; three cups for girls
  • Vegetables: two cups for boys; two cups for girls
  • Grains: four ounces for boys; four ounces for girls
  • Proteins: 32.4g for boys; 32.4g for girls
  • Milk: 17-20 ounces for boys; 17-20 ounces for girls
  • Water: 1500 ml for boys; 1500 ml for girls (around six cups)

 

Vaccinations and Common Sickness

Yur pikin no dey due for any new vaccine dis month. To fit sabi which vaccine yur pikin suppose don take by now, make yu click hia.

Yur pikin fit no dey catch some sickness becos of di vaccine wen he don take, but e still get common sickness like cold and flu wen fit catch am. Even wen all dis one dey boost him immune system, go see doktor if yur pikin dey show sign sey he get discomfort like sey, he dey vomit, run belle or get feva wen high.

Encourage yur pikin make he get beta hygiene especialli wen e reach to dey wash hand.

Treat Common Sickness

To fit manage some common sickness wen pikin dey get like feva, cough and cold, make yu try di following:

  • Feva: If yur pikin get feva wen don reach 38°C (100.4°F), give am plenti water drink and allow am rest well. Try soak small cloth inside water wen dey luke warm, use am take clean him fore head, arm pit and private part side make di feva fit come down. But once yur pikin temperature don pass 38°C (100.4°F)  e betta make yu carri am go see doktor.
  • Cough: We sabi sey cough na reflex action wen dey clear throat, but e dey sabi dey vex once catarrh and sneeze don follow am. Before yu even think sey yu wan go buy medicine, try home remedi like ginger and honey inside warm water. Allow yur pikin drink plenti water to ease any discomfort wen he dey feel. If yur pikin cough still no go afta three to five days, abeg carri am go see doktor.
  • Cold: Unless e don reach dat level wen yu go fit say "water don pass garri" , try make yu no take medicine wen yu buy ova counta for cold. Na virus dey cause cold, so antibiotics no fit work for am. If yur pikin dey get bodi pain and high feva with di cold, den e fit be influenza. Carri am go see doktor quick.

E good make yu know sey while yu fit buy medicine wen yu no get prescription, di first treatment wen yu suppose try na simple home remedi. For example, give pikin wen get cold plenti warm water drink. And if he get sore throat, make he use salt and warm water take gargle him throat.

Wen yu fit follow doktor talk

If yur pikin,

  • Get feva wen pass 39 degrees Celsius
  • Get some kine bruises, bumps or rashes
  • Dey always complain of headaches or oda aches
  • Dey vomit or pudge pass two days.

Previous month: 5 years 10 months

Next month: 6 years

Reference: Web MD

Republished with permission from theAsianparent

Translated By Anino Aganbi

Written by

Anino Aganbi