Yur 6 Years 4 Months Old Pikin Development and Milestones

Yur 6 Years 4 Months Old Pikin Development and Milestones

Plenti things dey wen yu fit see for yur 6 years 4 months old pikin development and milestones!

Na wa oh, dat yur smally of yesterday don 6 years 4 months old pikin! As yur pikin dey grow, na so yu sef dey follow am grow. Yu dey learn with am as yu still dey try navigate dis parenting matta. Na so yu fit sabi sey yur pikin dey develop.

Now, 6 years 4 months old pikin don dey undastand things wen dey happen around am. Becos of dis, he fit dey get fears (or dey anxious), about ghost or room wen dark among oda things.

Relax yur mind, all dese na psrt of yur pikin development dis month. Inside dis article, we go touch all di development wen yur 6 years 4 months old pikin suppose don achieve. No forget sey dis one na just make yu fit get rough idea o, no be sey yu must go force am for yur pikin bodi. Follow doktor yan if e get wetin yu no undastand about yur pikin development.

Make we see di milestone wen yur 6 years 4 months old pikin suppose don reach.

6 Years 4 Months Old Pikin Development and Milestones: Shey Yur Pikin Dey on Track?

6 Years 4 Months Old Development and Milestones

Physical Development

Yur 6 years 4 months old pikin go wan do efiri thing by himself, dis kine independence go dey hard on yu becos yu still dey see am as yur smally. No fear, all dis na sign sey yur pikin dey develop well well.

Yur pikin motor skills dey do well na im make am fit do some things by himself. By now, yur 6 years 4 months old pikin don sabi wear cloth by himself, catch ball well and tie him shoe lace join sef.

E go good make yu dey take notice of wen yur pikin get belle, head, leg pain or any oda kine pain. He don dey get more awareness about him bodi.

For dis age yur pikin height and weight suppose be:

  • Boys
    – Height: 117.8 cm (46.4 inches)
    – Weight: 21.6 kg (47.5 lb)
  • Girls
    – Height: 117.3 cm (46.2 inches)
    – Weight: 21.2 kg (46.6 lb)

Make we see oda physical development yur  6 years 4 months old pikin suppose get:

  • Fit do zip and button.
  • Sabi brush him/her hair.
  • Dey skip, catch big ball.
  • Draw stick pishure of person wen get eye, nose, mouth etc.
  • Balance with coordination don improve.
  • Sabi chop by himself.
  • Use pencil take draw and write.
Parenting Tips:
  • Make sure sey yur pikin get pass one hour wen he go use take run up and down efiri day.
  • Encourage yur pikin make he play/ do exercise. Wen yur pikin see yu dey do am, he go copy yu.
  • If money dey, go pay make dem fit teach yur pikin surviving skill like swimming and fire safeti training.
  • Know di kine game/sport wen yur pikin like, dem improve am.
Wen Yu Fit Follow Doktor Talk

If yur 6 years 4 months old pikin physical development no dey like before again, make yu go talk to doktor. Again make yu check for dese things for yur pikin:

  • Dey lose skill wen he been get before.
  • No sabi wear uniform by himself.
  • Been don stop to dey piss for bed but come start am again. By now he suppose don fit control him bladder.
  • Dey find am hard to sleep or dey wake plenti times before day break.

your child's development

Cognitive Development

Di way wen yur pikin take dey curious about efiri thing wen dey happen no dey end. Dat one dey ok becos he dey use efiri question wen he ask yu take learn. Him attention span don improve and e go make am fit concentrate for work, weda he dey house or school.

E go help yur pikin undastand sey efiri bodi no dey think di same way. Dis one go help yur pikin fit relate with him friends dem. Yur pikin also undastand wetin dey right/wrong.

Check for dese development for yur pikin:

  • Sabi di difference between wetin dey right and wrong.
  • Him mental skill dey quick develop.
  • Sabi oda ways wen fit use take tell yu wetin happen to am or about him thought and feelings.
  • No dey think about onli himself again.
  • Don dey get close friends.
  • Don dey get thoughts wen dey complex.
  • Him curiousiti no be hia o.
Parenting Tips:
  • Yu fit use yur own question take reply yur pikin plenti question, e go help am dey think well.
  • Carri yur pikin go places wen go encourage him curiositi like museum, librari and park.
  • Yur pikin fit dey fia to try new things. Na hia yu fit give am yur support. Tell am sey yu dey dia for am weda he get am or not.
Wen Yu Fit Follow Doktor Talk?
If yur pikin:
  • Dey agressive, weda he dey kick, knack, or blow oda pipo efiri time.
  • Dey withdraw from pipo.
  • Get problem wen he wan follow oda shidren talk/play.
  • No sabi him name wen yu call am.
  • Don too dey chewing gum yu.
  • Get problem wen yu give am instruction wen get two part.

how is your child relating with the world around her

Social and Emotional Development

Yur 6 years 4 months old pikin don dey put value for friendship . E go dey tricky for am as he dey learn how to control emotions like frustration or jealousy.

Wen yu look di bright side, yu go see sey yur pikin don dey get plenti patience. No matter how yur pikin take big reach, he go still need yur approval, and he go wan do things wen go make yu dey proud.

No matta how yur pikin take dey independent reach, he still need love and attention from yu.

Na dese milestones yur pikin suppose  don reach by now:

  • Becos he dey learn how to follow him mates cooperate, he place betta importance for friendship.
  • Dey pay more attention to him friends and sabi team work.
  • Want make him friends like and accept am.
  • Fit tell yu wetin happen from beginning reach end. Di things wen he dey think/feel as he dey relate with him mates dey increase.
  • Don dey think about future.
  • Undastand wetin him place be for dis life.
Parenting Tips:
  • No be efiri time yu go dey command yur pikin, allow am make some decision by himself.
  • Follow yur pikin talk about some kine things wen dey hard from way wen he fit undastand like peer pressure or bullying.
  • No be efiri time yu go dey handle matter gra-gra.
  • Help yur pikin build him self esteem, and encourage am make he fit express himself.
  • Follow yur pikin talk about how he dey feel and help am put dem for words.
Wen Yu Fit Follow Doktor Talk:
  • If yur pikin dey quiet wen he close from school, e fit be sign sey dem dey bully am.
  • If he/she shows extreme signs of aggression.

Yur 6 Years 4 Months Old Pikin Development and Milestones

Speech and Language Development

Yur six years 4 months old pikin don sabi speak well and he dey use sentence wen dey complete.

But make yu sabi sey even as yur pikin dey blow big big grammar, he go still find am hard to tell yu idea or event wen dey complex.

By now, yur pikin suppose don dey get interest to read and write, so now na di best time wen yu go start to buy book for am. Carri yur pikin go library make he feed him eye while yu and am go spend time togeda.

Oda speech and language milestone wen yur 6 years 4 months old pikin don reach by now:

  • Fit talk simple argument.
  • Dey undastand wen yu give am three different instruction once. Like make yu wash hand, keep yur book, then come chop"
  • Don dey see sey some words get pass one meaning.
  • Dey use tenses for sentence.
  • Don dey show interest for reading/writing.
  • Dey identifi word pattern.
  • Fit read numba/letta from beginning reach end and from end reach start.
Parenting Tips:
  • E good make yu sabi pipo wen dey in-charge of yur pikin for school.
  • Read give yur pikin, allow am read give yu sef. If he make mistake no shout on top him head becos of am.
  • Help yur pikin wen he get homework, but make sure sey na onli wen yu see sey he no undastand.
  • Teach yur pikin di correct way wen dem dey behave for class.
  • Follow yur pikin talk about wetin dey interest am weda na him best sports or animal.
  • Help yur pikin sabi how to count.

Wen Yu Fit Follow Doktor Talk:

If yu see sey yur pikin no fit:

  • Read simple sentence.
  • Talk make he no stammer.

child development 6 years 4 months old (1)

Health and Nutrition

Yur 6 years 4 months old pikin dey quick grow and to make sure sey he grow healthy, e betta make he get di correct nourishment wen he need efiri day.

Nutrition and exercise dey waka hand in hand so help yur pikin get 60 minutes of exercise efiri day.

With different kine food wen dey market, yu fit help yur pikin find di one wen dey best for am.


  • If yu wan buy grains, buy di one wen be 100% whole grain instead of di one wen dem just write made with whole grains put.
  • Wen yu dey serve meat or oda kine food wen get iron, make sure sey yu add food wen dey high for Vitamin C like sweet potato or tomatoes.
  • E betta make yur pikin ask for more dan sey make yu mount him plate for am.
See wetin yur pikin suppose chop efiri day:

Di daily dietary guideline wen dem recommend for 6 years 4 months old pikin na 1,200 calories wen dey different food nutrient group.

Di calorie intake for boys and girls  wen dey dis age na:

  • Boys: 1782.0 Kcal/day
  • Girls: 1672.0 Kcal/day
Dairy group

One of di best nutrient group for pikin wen dey grow na food wen get dairy product. Pikin wen dey dis age need 2 1/2 cup of milk or yogurt efiri day. Yu fit think of ways wen dey interesting wen yu fit sneak dairy products for yur pikin food.

Protein group

For pikin wen dey dis age group, CDC don talk sey make dem take at least 19 grams of protein efiri day. For pikin wen sabi select food, no fear!

Find food wen get protein wen yur pikin fit like, weda na home made chicken with cheeze pizza, scrambled egg with cheese or any oda food.

Fruit and vegetable group

Yu fit make dis one dey interesting for yur 6 years 4 months old pikin if yu dey creative. Allow yur pikin help yu for kitchen sef, make yu use di chance take hear weda him language skill dey improve.

Pikin wen dey dis age go need 1 cup of fruit and 1 1/2 cup of vegetable with him food.


Yur 6 years 4 months old pikin need  4 ounces of grains efiri day. Yu fit give am cereal or one slice of bread wen yu bake for house or half cup of pasta four times a day.

From di plenti choices wen yu get yu fit give am food wen get whole grain inside dem, but if yu wan give refined grain, no make am be efiri day.

To summarize am, na wetin yur pikin need be dis, yu fit check up for di amount:

  • Fruits: three cup for boys; three cups for girls
  • Vegetables: two cups for boys; two cups for girls
  • Grains: four ounces for boys; four ounces for girls
  • Proteins: 36g for boys; 36g for girls
  • Milk: 17-20 ounces for boys; 17-20 ounces for girls
  • Water: 1500 ml for boys; 1500 ml for girls (around six cups)
  • Make yur pikin use fruits and vegetable take do snacks. Afta yu wash am, cut am put for wia him hand go fit reach.
  • Give am salad more.
  • Add plenti vegetable to meat and sauce wen yu wan use for pasta.
Wen yu fit follow doktor talk?
If yur pikin
  • Dey unda-weight/ova-weight
  • Vomit efiri time wen he dey chop

Vaccinations and Common Sickness

Yur pikin don take all him vaccines by now. Ask yur doktor if e still get oda ones wen yur pikin suppose take from time to time.

Di more time wen yur pikin dey spend for school, he fit catch disease like common colds and the flu. Also e good make yu dey check him bodi weda he get rashes. Encourage yur pikin make he tell yu wen anything dey do am.

E dey important make parents sabi sey efiri pikin no dey grow di same way. All dem dey unique for dia own way. E good make una sabi sey all di things wen we tell una about pikin milestone na just guideline, so if  e get wetin yu no undastand, go see doktor.

To Treat Common Sickness

If yu wan manage di common sickness wen pikin dey quick get- feva, cold and cough- make yu try di following:

  • To treat feva: If yu see sey yur pikin dey get feva wen reach 38°C (100.4°F), e good make yu try some home remedi first. Soak cloth inside water wen warm use take clean him head. Also, make yu wia cloth wen dey light for yur pikin. Make sure sey he chop well and make he drink plenti water. If all dat no work, den carri am go see doktor. Make yu no try give yur pikin aspirin o becos na load wen yu no fit carri yu dey find so. E fit cause damage for yur pikin liver and brain.
  • To treat cough: If yur pikin dey get cough, try give am half teaspoon of honey wen dark , dat one dey work beocs e get high antioxidant inside am. Yu fit make chicken soup for am, e go help am clear him throat and nose. If yu get humidifier, yu fit put am for yur pikin room as e go help am clear him chest and nose for night.
  • To treat cold: Cold dey stop by e self afta some days, but make yu fit dey safe, e good make yu give am warm water wen yu mix with lemon and honey. Yu fit use pillow take raise yur pikin head make he for breathe well.

If any of dese home remedi no work, e betta make yu go see doktor. As na dem go fit tell yu which medicine fit work for am.

Wen yu fit follow doktor talk

If yur pikin,

  • Get feva wen high pass 39 degrees Celsius
  • Get bruise/bumps/or rashes wen yu no just sabi.
  • Dey always complain sey head or oda parts of him bodi dey so so pain am.
  • Dey vomit or run belle pass two days.

References: WebMD, CDC, Webmd, Kidshealth, MSF

Previous month: 6 years 3 months

Next month: 6 years 5 months

Republished with permission from theAsianparent

Translated by Anino Aganbi

Written by

Anino Aganbi