5 Natural Ways To Take Commot Stretch Marks
Women dey struggle to get flawless skins and coconut oil go fit help yu achieve am. See how yu fit use coconut oil commot stretch marks.
Hia Na 5 Ways To Use Coconut-oil Commot Stretch Marks.
1. Ordinari coconut oil
Yu fit use ordinari coconut oil commot stretch marks [Style craze]
Yu fit use ordinari coconut-oil take commot di stretch marks wen dey yur skin. Wetin yu need na to heat di coconut oil small so e no go burn yur skin. Massage am for yur skin reach 5-10 minutes for night. Leave am ova night den wash am for morning. Repeat am efiri day for betta result.
2. Coconut oil and aloe vera
Combination of coconut oil and aloe vera no go just clear stretch marks for yur bodi; e go give yur skin nutrient wen e need take shine. Mix one tablespoon of coconut oil and aloe vera gel.
Allow di mixture make e warm small, den massage am for di affected parts for 5-10 minutes. Make di oil dey yur skin ova night den repeat di process efiri day if yu wan get di best result.
3. Coconut oil and turmeric
Turmeric dey effective if yu wan treat skin problems and boost collagen development. Wen yu combine am with coconut oil, stretch marks go disappear.
For am to work, mix half teaspoon of turmeric powder with one teaspoon of coconut oil. Massage am for di parts wen dey affected.
Leave am for one hour before yu wash am. Make sure sey yu use moisturizer once yu don wash di mixture commot. Repeat dis process efiri day.
4. Coconut oil and shea butter
Shea butter get betta populariti becos e get abiliti to make yur skin dey healthi. E get anti-inflammatory properti wen dey commot stretch marks.
Mix one tablespoon of coconut oil and shea butter inside bowl. Apply di mixture for di parts wen dey affected, den leave am till morning.
5. Coconut oil and olive oil
Mixture of coconut and olive oil go do wonda for yur skin. Mix half teaspoon of olive oil with one teaspoon of coconut oil.
Massage am for di areas wen dey affected, den leave am ovanight. Do dis process efiri day.
Written By Pulse.Ng
Translated By Anino Aganbi