Meningitis: Wetin E Be And How We Go Fit Avoid Am?
Meningitis na strong disease wey fit deal with pesin. If you wan know as e dey be for body and how you fit avoid am, dis article go explain am well.
Meningitis na rear infection wey dey affect de delicate membranes wey dem dey call meninges. Meninges dey surround de brain and spinal cord. Dem meningitis symptoms fit start as headache or fever and go to stiff neck.
According to dem statistics from WHO as of March 2017, dem record a total of 1407 cases wey dem suspect sey na meningitis and 211 people wey die from meningitis among 40 local gofament for 5 states for Naija. Dis disease fit affect anybody whether na old or young, and according to dem report from WHO de group wey de tin affect pass na dose wey dey between 5 and 14 years old.
Wetin be dem meningitis symptoms
Wen e still dey early meningitis symptoms fit start as cold and headache. Den de symptoms fit dey show face after some hours or after some days.
For anybody wey dem age don pass 2, na dem possible meningitis symptoms be dis:
- Sudden high fever
- Stiff neck
- Strong headache wey go be like sey dem dey harmer you for head
- Headache with nausea or vomiting
- Confusion or difficulty to concentrate
- Sleepiness or difficulty waking
- Sensitivity to light
- No appetite or thirst
- Skin rash (sometimes, for case of meningococcal meningitis)
For babies wey never reach 2 years old, na dem possible meningitis symptoms be dis:
- High fever
- Cry cry all de time
- Too much sleep
- Inactivity or sluggishness
- Poor feeding
- De soft spot on top of de baby head (fontanel) fit swell
- Baby body and neck fit stiff
If you or your pikin contract meningitis and una no treat am on time, e fit get worse and lead to inability to hear, loss of memory, inability to learn, damage to de brain, difficulty to waka, seizures, kidney failure, shock and den death.
Causes of Meningitis
Na virus be de common cause of meninitis. Bacterial infection too fit cause am and in small case e fit be fungal infections. E dey always start first from around de side of de body wey dey near de brain.
· Bacterial meningitis
Wen bacteria enter de blood and e come move from de blood to de brain and spinal cord, e fit cause serious bacterial meningitis. Sometimes too, e fit be sey de bacteria enter through de part wey dey near de brain like de ear or wen part of de skull break. Dem bacteria wey dey cause bacterial meningitis na:
Streptococcus pneumoniae (pneumococcus). Dis na one of dem common cause of bacterial meningitis. E dey affect both small children and old people and e fit cause infection for ear.
Neisseria meningitidis (meningococcus). Dis bacteria dey cause infection for de upper respiratory, if e come enter de blood stream e fit cause meningococcal meningitis. Dis one dey contagious so care need to dey wen person contract am.
Haemophilus influenzae (haemophilus). Before before na dis Haemophilus influenzae type b (Hib) bacterium bin dey cause meningitis pass, but vaccination don helep reduce am.
Listeria monocytogenes (listeria). Dis kain bacterium fit dey inside raw milk like nunu, raw vegetables, raw or half-cooked meat, smoked fish. Dem people wey dis bacterium dey affect pass na dose wey get weak immune system, e fit be pregnant women, small pikin or old people.
· Viral meningitis
De meningitis wey virus dey cause no really dey serious. Usually na de group of virus wey dem dey call enteroviruses dey cause am. Other virus like herpes simplex virus, HIV, mumps, West Nile virus fit also cause viral meningitis.
· Fungal meningitis
Dem fungal meningitis nor dey common. Na small small organisms wey dey colonise de membranes and fluid wey near brain dey cause dis chronic meningitis. Dis chronic meningitis fit develop in two weeks or more. Dem common signs na headaches, fever, vomiting and mental cloudiness.
How to prevent meningitis
Meningitis dey contagious, e mean sey e fit spread from one person to another through cough, sneeze, kiss or sharing tins wey get fluid of person wey get meningitis on top. To prevent meninigitis:
- Wash fruits and vegetables
Fruits and vegetables na good place for dem virus and bacteria to stay. Before you start to dey chew fruits or vegetable, make sure sey dem dey clean. Wash dem with clean water before you eat dem.
- Wash your hand
Always wash your hand before you chop, always wash your hand wen you don commot from toilet. Also, if you don come back from public places, wash your hand before you start to eat.
- Eat well
Eat food wey go helep your immune system to dey alright. Practice balanced diet, eat fresh fruits and vegetables .
- Practice good hygiene
Nor share personal items like toothbrush with people. Wash utensils very well before you use dem to eat.
If I get am, wetin I fit do?
Now wey you don know dem meningitis symptoms and dem causes, prevention na im beta pass cure. But in any case wey be sey you notice any of dem symptoms, try to consult your dokito quick quick. If proper care and vaccination dey in place, meningitis no go take life. Always make sure sey you and your family dey healthy.
To take reduce de meningitis for Naija, Nigeria Centre for Disease control with de joint effort of World Health Organisation don get rapid response team wey dey helep respond to outbreak of meningitis for Naija. Dem dey roll out MenA conjugae vaccine wey dey helep reduce de rate of meningitis for Naija.
Read also: What happens when you miss a vaccination?