You know Say You get Naija Parent When...
To dey stay for inside Naija house dey sweet. Our people too get drama. You Know Sey You Get Naija Parent When you See Dese Signs
Naija parents na wonderful people dem be. E get some special qualities wey dey identify dem say dem be Naija parent. Anywhere wey you find dem, whether na Naija or na abroad, dem go still showcase dese qualities wey we dey yan about. You know sey you get Naija parent when you notice dese qualities wey dey below:
From de way Naija parents take dey talk to dem children, you go know sey dem be Naija parent. Na Naija parents dey reply deir pikin “sorry” with sorry for ya sef. If pikin do tins wey Naija mama no like, na shout she go use react. She go tell de pikin sey she no kill her mama and de pikin must not kill her. No be only dat, if you tell Naija parent sey you wan go visit your friend, dem go ask you when last your friend come visit you for your own house.
Naija papa and mama sabi talk dis kain word. Other people go be like bad influence on dem pikin. So wether de pikin dey go school or anywhere wey dem no go fit monitor am, dem go tell am make im remember de son or daughter of who im be. Dis one na warning for de pikin make e nor go dey misbehave because im parent no dey around.
You know say you get Naija parents when dem fit call you to do anything for dem. Your papa fit dey inside palour make im call you wey dey inside your room make you helep him bring remote wey dey beside him. Your mama fit send you make you buy ingredient for soup up to five times before soup go don. If you complain sey you dey tire for de work wey dem dey give you, na im be sey you don get another parent wey go dey take care of you.
One quality about Naija parents be say dem fit pass message to you and dem no go open mouth to talk. If visitor enter house, e get as dem go use eye tell you make you give dem space. If you and dem go visit person, e get as dem go use dem eye, hand or leg take signal you make you behave yourself. And if de pikin ignore dose kain message, e fit land am for trouble.
As long as you dey under deir roof, Naija parents no dey gree sey dem dey wrong. Even if e dey obvious sey dem dey wrong, dem go find as dem go take justify demself or avoid de mata completely. E dey hard Naija parent to say sorry, especially to dem pikin. Naija parent no like make dem correct dem, as deir pikin e dey rude to do dat kain tin.
Once you see dese tins, e sure sey you dey live with Naija parents. To dey live inside Naija home dey sweet. E also get drama wey add join. Pikin go enjoy de drama, catch fun and learn as dem suppose behave.
Read Also: How Do I Control My Anger As A Parent?